最近，天河一家商场举办咗“2015年岭南膏方节”活动，好多资深中医专家去到现场指导用药，吸引咗唔少街坊参与。

“岭南”二字成为中成药生招牌，其实早有基础。长期以来，广州本地药企嘅名气都非常大，好似陈李济、何济公、王老吉、潘高寿、敬修堂、星群之类嘅老字号，历史分分钟达到几十年甚至几百年。佢哋对岭南人嘅体质了如指掌，研制出壮腰健肾丸、蜜炼川贝枇杷膏、止痛退热散、夏桑菊冲剂等拳头产品，唔止喺本地街坊心中接受度好高，而且好多仲远销海外。

岭南中医药业嘅兴盛与自成一格，同当地地理条件息息相关。自古以来，岭南就被称为“瘴毒之地”，树林多、天气热、湿度大，滋生各种病毒细菌；而且，咁样嘅环境亦令到人体变得“湿热”，毒素好难排走，所以就容易病啦。

因为呢类特点，北方中医来到岭南亦未必适应，“温补”等治疗寒病嘅方法，喺呢度有可能“火上浇油”。所以需要有针对性咁落药，先可以药到病除。有鉴及此，两千几年来，本地中医就喺传统理论嘅基础上，结合本地环境特点、当地人体质以及广东特产药材，逐渐形成集名医、名药、名企于一体嘅岭南中医体系，成为中国传统医药嘅重要流派。

岭南人，拥有咁独特完善嘅医药系统，心中嘅安全感都几高嘎。